【大紅龍與四大爪牙的罩門】（下）
上回提要：
大紅龍入村，到處破壞。激發村民突破界限，進化成勇者，佢地發現四大爪牙各有死穴。勇者們要贏，就要對準罩門，大大力踢落去……
A級怪：本地商家佬
之前提及既「藍絲廢老」、「元朗白」、「福建紅」，主力物理性攻擊。「商家佬」則擅長心靈攻擊，佢地會製造白色恐怖同民意風向，削弱一般村民對勇者既支持。
商家佬「奶共」，與其資金背景無直接關系。老牌英資國泰航空，都會忽然發惡，炒晒黃絲員工。本土企業美心，太子女伍淑清又會無啦啦走去聯合國講野，抹黑呢場逆權運動。
在商言商，中共控制既十四億人龐大市場，遠比香港七百萬人既喜惡重要。 人地0.1%已經有百四萬中國人，抵銷到呢度二百萬黃絲。加上香港人出名無腰骨加 「金魚腦」，所有杯葛、罷買都只得三分鐘熱度，轉過頭就無件事。所以，咁多年黎商家佬無驚過，點樣奶共賣港都無後果。從香港人身上賺到既錢，一蚊都無少過。
係呢度，不得不感謝蒙面人特事特辦，係電光火石之間，以最低必要武力令班商家佬覺醒。平時佢地KOL上身（尤其係做地產經紀果個），而家有無出聲譴責？無呀！點解呀？因為佢地見到香港人終於識得反抗，奶共要付出代價喇。
生意做得越大、越有錢果班，就越驚，因為一個二個都係靠地產發大財。佢地區區有商場、度度開連鎖店。莫講話「被裝修」，個場拎黎開〈願榮光歸香港〉演唱會，班租客已經做唔到生意，直接扣HP。
以前班有錢佬愛出風頭，係要「響朵」，搲返一官半職。當公司要為老細言論埋單，你估其他股東肯唔肯過佢呀拿？再講，遍地開花式抗爭係地圖炮，直接衝擊零售業、間接影響商場租金。呢D都係佢地罩門。曠持日久，實會頂唔順，暗啞底向政府施壓，要政府拿拿臨收拾爛攤子。
S級小頭目：Carrie、高官、親中政客
呢班小頭目，權力源自中共，香港人係奈佢地唔何。不過佢地有一個人所共知既死穴，就係「恐共」。佢地深知大紅龍有幾可怕，所以攀附權力之餘，不忘搵定後路。唔好話林鄭、葉劉等等有名有姓既高官權貴，一家大細拎住外國護照，連謝振中呢D芝麻小官都搞緊美國綠卡（註三）。
有見及此，勇者們落力推動美國國會通過〈香港人權及民主法案〉。配合埋現有既〈馬格尼茨基法案〉，呢班中共走狗好快會成為美中貿易戰既談判籌碼，隨時畀侵侵拎去祭旗。被西方世界制裁既下場，就係全家永世留係大灣區，你估佢地唔驚架咩。
呢條法案威力有幾大，我唔直接答你，用例子答：除左葉劉，仲有邊個保皇黨政客有出黎幫Carrie說好話？除左差佬，仲有邊個高官出黎為Carrie吶喊助威。成個親政府集團，敢伸個頭出黎既反常地少。一陣畀Solomon Yue選中，為制裁做示範就大鑊了（註四）。
勇者們未夠level，動到呢D小頭目一分一毫，但佢地可以多玩twitter，多上reddit同4chan做文宣，幫手召喚外國勢力。將呢班人由雲端拉返落地，齊齊共享中國人榮耀。
SS級最終大佬：中共
香港之所以仲未變新疆，係因為香港地位特殊，對中國經濟好重要（註五）。Carrie今鋪越賭越大，不惜動用〈緊急法〉呢個金手指，無人估到佢會再出咩野茅招。加上呢幾個月，所有野都由Carrie同警察說了算（表面上）。係人都見到香港由rule of law，逐漸變為rule by law。（其中一個顯例：「無罪假定」實際上已告失效。差佬明目張膽係鏡頭面前講大話、插贓嫁禍、亂捕亂告。被告反而要自行搜集證據，去證明差佬提出「證據」係假既。完全乖離普通法精神。）
試問一個缺乏法律保障既城市，又點可能繼續做國際金融中心？睇下上海/前海，硬件最新最先進又如何？都係吸引唔到外國人放心投資。外資撤退，經濟將會一潭死水，中共為保政權，就要重返毛澤東鎖國年代。你要十四億人由奢入儉，誰能擔保天下太平。
其實，香港本身就係大紅龍其中一個罩門。不過，惡龍字典係無「讓步」和「妥協」。佢成日用「膽小鬼博弈」策略（註四），為左唔畀人贏，分分鐘不惜先打爆自己春袋。
可以打到人地痛既策略，才是有效既策略。唔好諗住不痛不癢既攻擊可以擊退敵人。
勇者們請緊記：對準罩門，大大力踢落去！
註：
- 〈網傳謝振中太太坐移民監 黃之鋒向美交資料鼓勵全家留大灣區做中國人〉，852郵報，2019–10–4
- 〈美共和黨員因乜事點名制裁葉劉? 葉劉怒回：我冇做過〉，經濟通，2019–9–10
- 〈70％外資從這來！ 經濟學者：中國毀掉香港無異自宮〉，自由時報，2019–6–18
- 膽小鬼博弈（The game of chicken），宗旨係「唔要命既就係贏家」。例如兩個人駕車踩行油要迎頭相撞，邊個先扭軚就邊個輸
(2019–10–10)