【迪士尼樂園疑似藏有大量「攻擊性武器」 | 學界政界代表被長期跟蹤】
一、
報載（註一）：
8月6日晚上7時許，浸大學生會會長方仲賢於深水埗鴨寮街一店舖購買觀星筆，被便衣警員以「涉嫌藏有攻擊性武器」為由拘捕。
引起店舖職員及街坊起哄，質疑警方製造「白色恐怖」，胡亂拘捕市民……
Well，唔怪得香港迪士尼樂園入面果個「巴斯光年星際歷險」（Buzz Lightyear Astro Blasters）係前年夏天收左皮，要改建做另一款機動遊戲啦。原來呢D「雷射/激光槍」已經被香港警察定性為「攻擊性武器」，大人兒童都不宜！
至於美國迪士尼公司，繼利用「小熊維尼」嘲諷咱們國家領導人之後；又係香港建立反動基地，暗中係主題公園實地訓練港孩使用極其危險「巴斯光年雷射激光槍」。足以證明外國勢力想意圖係香港搞顏色革命，反中亂港之心不死。
西米支持林鄭市長率領三萬香港警察，及二百元朗白衫刀手，操入欣澳，拉人封鋪！並促請特區政府邀請中國外交部，出動「華春瑩咀炮」還擊美帝！
二、
By the way，今次浸大學生會會長係鴨寮街shopping畀便衣探員「偶然」發現，並且拘捕，並唔係個別事件。（Update：傳真社於八月十日有跟進報道）（註四）
前幾日香港民族黨陳浩天（因為提倡「港獨」而畀香港政府取諦果個）係火炭個貨倉無啦啦畀人搜（註二）。警方既解釋係，佢地調查爆竊案果陣，咁岩係工廈停車場見到有人鬼鬼祟祟咁推住車仔。警員上前截查，搜出樓上某單位既鎖匙，順籐摸瓜，上門，入屋，拉人。罪名？又係「藏有攻擊性武器」。
火炭坳背灣街係純工業區（街頭街尾既公屋、居屋、私樓仲起緊，未入伙），果度既返工文化係準時六點收工，七點打後各幢工廈已經落大閘，成條街人跡罕至。警察又會咁岩係敏感既日子，去到陳浩天呢D敏感人物租既工廈單位樓下查爆竊案既？
呢場社會運動搞到政府束手無策，為左「滅大台」，阻人上街，佢地乜都做得出。我敢講，警方已經長期跟蹤反政府既重點人物（如各大學學生會、社運人士、議員政客、鍾意「發夢」既青少年）。佢地上次係陳浩天個竇發現弓箭壘球棍，立左大功。今次見到大學學生會會長買「觀星筆」，仲唔照版煮碗？
經常「發夢」既朋友，呢排行街買野要小心D，如非必要，唔好去7仔買遮/寶礦力，你知啦，呢D都classified為「攻擊性武器」。就算阿媽叫你去百佳買鷹粟粉，你都唔好去。分分鐘有便衣探員衝出黎屈你藏毒，就算明知告唔入，屈你坐返一頭半個月監夠好啦。大家唔好笑，班差佬將「生粉」話係「白粉」，早有先例（已fact check），並非六七十年代既陳年舊事（註三）。事主咁就坐左六個星期冤獄啦陰公！
#巴斯光年 #大殺傷力武器
註：
- 〈購觀星筆被指涉藏攻擊性武器 浸大學生會會長被捕送院〉，香港電台，2019–8–6
2. 〈警搜火炭工廈單位拘陳浩天等 8 人 指藏汽油彈弓箭等武器〉，立場新聞，2019–8–2
3. 〈警強搜屋拘人扣6周 檢走「白粉」證實鷹粟粉〉，明報，2018–9–8
4. 〈鴨寮街閉路電視畫面顯示 方仲賢購物前警員無特定方向行走 購物後始尾隨其後〉，傳真社，2019–8–10
(2019–8–6)
傳送門：西米Go短評 #001–100，#101–200，#201–300
傳送門：係香港既火車/地鐵影相，犯法嗎？
傳送門：香港司法獨立也要「壽終正寑」嗎？
