回憶執屋之旅（零）

細個嗰陣，有好長時間同婆婆一齊住。佢成日帶我周圍去，搭車嗰陣會講下佢後生啲威水史，講佢爬過啲咩山，去過邊度探險，打過咩工，見過咩大場面。我肯定佢講過好多嘢我聽，但係我從來都淨係聽，冇有系統噉記低。到佢兩年前過咗身，我好努力噉諗返佢講過嘅經歷，想像下佢嘅童年，想像下同我未重疊嘅人生究竟係咩模樣。但係發現原來我記得嘅嘢係得咁少，少到十隻手指都數得晒。

今日記得嘅，聽日就變樣；唔及時記低，就會長埋塵土。

如果一個大吉利是我今日就離開咗呢個世界，又或者俾人扑穿個頭失咗憶，其他人會記得幾多關於我嘅嘢？佢哋印象入面嘅我，係咪我想佢哋記住嘅我呢？

於是我有個諗法，就係趁自己未算好老，記憶尚算清晰嘅時候，寫低我嘅童年回憶。等仔女大個咗，都可以睇到一個好難接觸到嘅「我」。冇人有興趣都冇所謂，我就當係俾自己整理吓思緒，用一個唔使掉晒全屋傢俬嘅方法（konmari），幫記憶執屋都好。

我唔想為自己設限，唔會有嚴謹結構，亦都冇故事鋪排。我好佩服 IF 、 史兄 可以將自己嘅往事寫得咁好睇，我實在冇咁嘅功力。我寫開啲又長又唚嘅文，預計唔會太好睇。若果要我諗過度過，嘥時間去潤飾，可能等到我五十歲都未落筆。而家嘅打算係每次寫一樣我想記住嘅舊事。期間我會盡量誠實面對自己，不過難免有時會連自己都呃埋，大家睇到我寫嘅我，係我想像中嘅自己，亦都係我想大家記住嘅我。

講咁多，即係幾時有得睇？我逢星期三、六會擺喺度。唔會特別宣傳，有緣嘅就會睇到。