因仍空想超短篇：《寵物展》（中）

「純一眨眼﹗佢應該收到我把聲喇﹗」阿謀隔住會場天花板鑽出嚟嘅一個窿望到純一。

「響會場嘅魯魯氣氛好似有啲變咗……係咪主角出場喇？」鼠王雖然響組織都算高位，但係遇著呢個時候亦難免緊張起嚟。

「應該係喇。」反而阿謀相對仲冷靜，「而家隱約見到佢響入口行緊入去。純一，主角到。唔好急，按照原本計劃佢會經過你呢度。」

阿謀再望出去，見到純一冇反應，但心入面相信佢已經收到。就算唔使提水，純一都好清楚要點做。

呢一刻，純一睇落就好似一個靜待時機嘅獵人咁，等待佢嘅獵物一步一步咁由魯魯群之中響佢嘅視線浮現⋯⋯

當見到大統領嘅頭出現時，阿謀覺得佢今日同以前偶然響電視上見到嘅佢冇乜分別：表面上親切（蜥蜴嘅笑容阿謀實在分辨唔到），但又充滿住威嚴嘅氣場。

講起上嚟，其實人類都係最近一年先至叫做睇到魯魯嘅「電視」。雖然自從佢哋接收左人類之後，資訊傳播嘅媒介都跟返人類一直所用嘅電波同互聯網，但由於魯魯嘅眼睛構造同人類唔同，就算資訊科技硬件上同人類嘅相近，但係佢哋用嘅螢幕，人類睇嘅話只會係白茫茫一片。加上一般人唔會聽得明佢哋講乜嘢，久而久之魯魯就掌握晒資訊嘅流通喇。

直至舊年，鼠王佢地破解到畫面，再將技術秘密咁同其他人類地下組織去分享，阿謀同純一先見到大統領嘅真身。講起上嚟，魯魯話嘅聲音翻譯都係跟幾個月先靠人工智能有少少成果。

「咦，佢慢慢咁行左去個台度喎。」阿謀講。佢兩個都見到大統領同身邊嘅幾隻貼身魯魯 — — 相信係保鑣 — — 一步步咁邊同身邊嘅魯魯打招呼，邊行緊上去會場嘅主舞台。

就好似平時展覽場地入邊搭建嘅咁，一個長20米、高1米嘅紅色舞台，吸引着全場觀眾嘅視線。舞台後面背景寫住一堆嘢，相信係現今地球上無人類睇得明嘅魯魯文字。

「&/$:$;(@(@!!!! $:!(&,,’”-“@@:;…」

大統領企好響正中央後，身邊有隻司儀咁嘅魯魯講咗啲嘢介紹。跟住大統領就開始發表佢嘅演說。人類所期待嘅好戲，應該就會響演說之後開始。如無意外嘅話。

X X X X X X

「!;&;&;&;&&;&(&(&@“@!-:&.&:&…!&(&(@(」

純一雖然唔係百分百清楚發生緊乜事，但大概都可以估到。頭先佢俾賣家帶入嚟會場嘅時候，經過一個紅色嘅舞台。

應該係「主角」去咗嗰度講緊嘢啦。淨係聽到一把聲響度單方面講話。

連賣家都聚精會神咁聽，冇理過純一。於是佢就趁機會用眨眼向阿謀發咗個摩斯密碼訊息：「演講，翻譯機。」

「呀係喎⋯⋯好你等陣⋯⋯」左耳接收器傳出阿謀嘅回答。

雖然就算聽得明都冇乜用，但係知己知彼，了解多一分敵人嘅諗法，對之後嘅行動都會係有多一分幫助嘅，純一心諗。

「唔，佢話⋯⋯諗返起我哋嚟到地球已經有十年，」阿謀向純一翻譯，「呢十年嚟，我哋族人響呢度取得突破性嘅發展，由魯魯帶起嘅努力令呢度嘅物種得到更好嘅生活。諸位魯魯睇吓﹗而家嘅人類，冇哂疾病同貧窮，地球上亦已經冇哂戰亂。響魯魯作為新主人嘅時代，人類只需要順從，就可以有更多嘅生活……」

「我呸﹗仲講埋哂自己點勁法﹗人類就係因為你班友仔，冇咗自我，被當寵物看待，搞到生不如死﹗」鼠王咬牙切齒咁講，但又當然唔敢咁大聲。

「響好耐以前我養過一隻貓，佢叫阿花，」響隔離嘅阿謀冇再翻譯，不自覺咁講咗佢自己嘅事，「我以為自己好了解佢，到佢死之前一刻，食嘅住嘅我都係俾佢最好。但直到魯魯突然嚟到地球，並且當咗我哋係佢哋寵物之後，我先敢話自己了解阿花嘅感受……呢啲唔係諷刺係乜？」

冇人答到阿謀呢個問題，於是佢又講︰「鼠王，放心……佢哋唔威得幾耐…… 革命嘅序幕要開始喇……

「只係純一，呢次要你犧牲喇……」

（待續）