回憶執屋：外篇1

今次係交吉前執啲嘢返自己屋企

之前執屋，只係得閒無聊；今次執屋，係因為間屋忽然要交返出嚟，有啲倉猝。喺間屋消失之前，希望執得幾多得幾多。

環保人士成日講某某物質要幾千幾百年先分解到，所以要減少製造要循環再造。物質上我阿爸佢一啲都唔環保，淨係佢嗌茶餐廳嘅外賣盒都可以填滿一個長洲，不過佢嘅精神生命係我見過最環保嘅人，真係啲哆多餘嘅嘢都冇留低。抽象嘅嘢，思想、傳統、回憶、理想佢冇同人分享，實在嘅書信、相片、錄音都冇幾多剩。「只留低腳印、只帶走回憶」係郊野公園口號；佢再進一步，就連腳印都冇留低。

識得好多老人家，好多嘢講，聽一單新聞可以發表一個鐘偉論。佢就相反，一個語段唔會超過兩句。佢好鍾意睇電影。最後兩個半月喺屋企嘅時間，佢都係同機頂盒做朋友。由朝到晚睇戲。聽講佢睇咗幾次屍殺列車，四十集大時代，仲有唔知幾多套成龍。問佢有咩睇法？或者有，不過可能只係覺得自己組織得唔好。「呢套好睇呀。好好睇呀，我睇咗三次。」我諗有啲似 Facebook 嗰啲齋 like 永遠唔留言嘅朋友。有多過一句，已經係賺到。

沉默寡言嘅人，如果唔係一齊生活，就真係會冇交流，會冇存在感。佢講嘢好 transactional，一來一回，冇廢話，只得資訊。一個星期前最後一次同佢講電話，係佢揾我嗌 FoodPanda。

「阿仔幫我嗌外賣吖。碎牛粥、腸粉、油炸鬼。」

「好而家落單」

半個鐘後，應該係佢發現外賣冇送腸粉，打返俾我。

「你有冇嗌腸粉呀？」

「六點前冇腸粉呀」

「哦。」

呢幾個月我覺得自己係長期病患 FoodPanda 落單專員。今次唔係我漏單，唔係我想佢戒口，而係六點前粥舖冇做腸粉。

我冇問佢啲粥好唔好食。一嚟答案來來去去都係得一句，二嚟佢收綫真係收得好快。一句起兩句止，講完就收線。我估應該唔係太好食，因為佢第二日都冇再揾我嗌粥。

聽講藏人嘅傳統，有親友過身，就會燒晒佢哋啲嘢，然後忘記咗佢。不過佢已經瀟灑到好似冇喺世上存在過噉，都冇嘢俾我去燒。與其遺忘，不如揀啲有價值嘅事寫低留念？