回憶執屋之旅（五）

〈神秘通道大屋〉

喺搬去住唐樓之前，我係住喺同區嘅豪宅嘅。呢間屋嘅間格，要奇怪到我過咗就快三十年都仲記得。聽講係嗰時我阿爸識咗個室內設計師，完全由佢諗出嚟嘅。

如果你係呢間屋當年嘅設計師，不如喺下低留個言。

本身呢間屋都有返咁上下大，睇返地產網，建築面積過千呎。個廳超大，有一個地台，鋪咗白色毛毛地氈，擺咗一堆音響。其實我全屋都唔識音響嘢電子嘢，所以全部都係揾人裝，兩老淨係識得入 LD —— 當年仲係用緊啲成隻平底鑊咁大隻嘅碟—— 開電視，同撳 play 掣，個 amp 呀，nicam 機呀，基本上佢哋唔會郁。個廳佢哋整咗三色燈，有白、藍、粉紅三隻色，我到而家都唔明一間屋要咁多隻色做乜。

原本間屋係四四方方嘅，一入門口就係大廳。個設計係將個廳整咗做一個梯形，門口喺梯形嘅下底。左前方，即係斜咗嗰一邊，係打斜嘅 open bar，口日山枱後面有升盤真係可以煮嘢食同 serve 嘢飲。個廳嘅正面，亦即係個梯形嘅上底，係再升高咗嘅地台，左右有兩道摥(tong3)門，要行上三級樓梯先至入得到去。兩道摥門都係通去主人房，即係我阿爸阿媽間房。

噉我間房喺邊呢？廁所喺邊呢？我間房一定要經吧枱或者主人房入。即係我間房係有三道門。主人房有道側門可以落樓梯去到我間房，吧枱嘅盡頭又係我間房。仲有一道門去廁所。所以全屋要去廁所都要經過我間房。如果我冇記錯，我間房係一個五邊形，大家有機會一定要試下瞓五邊形嘅房，睇下係咩感覺。

搬走咗廿幾年，我都仲係好鍾意呢間周圍都係神秘通道嘅屋。

我好想畫平面圖，不過啲比例真係完全記唔到⋯⋯ 唔知當年嘅買家有冇拆晒啲裝修呢？

呢間咁神奇嘅屋，我只係住咗幾個月。

我喺呢間屋最後一個回憶，係交吉嗰一日。嗰日要返學。讀緊小二嘅我，係婆婆接我放學返去會合大家。嗰日我拎住美術堂嘅功課喺手，題目係自畫像。我用黃色水筆畫到自己成隻肝硬化嘅 Pepe 噉款。嗰幅畫攞咗 D——係全班唯一一個，我估我係有啲唔開心嘅。返到去，間屋嘅買家（兩公婆）都喺度， 太太話覺得幅畫好靚，問我可唔可以送俾佢。當時我當然冇乜自知之明，但係佢呢個舉動實在係令我好開心。就算佢拎返去捩手就掉咗都好，都係令到一個攞 D 嘅人有返少少自信。

點解我要用咁多時間去寫一間屋嘅裝修呢？因為我記事件好差。好多事已經記唔得清楚，但係對每個地方嘅擺設就總會有啲印象。諗返裝修嘅細節，又會勾起返啲埋沒咗嘅記憶。