原來擺酒俾禮金已經進化到呢個地埗

「我以後去飲一定會俾足四位數」 罰抄一百次

過咗三十大關，身邊啲 IT 朋友同 IT look 嘅朋友都開始有着落，結婚嘅結婚，生仔嘅生仔。就算自己未結婚嘅，個個月都去飲，可能飲咗一百幾十餐，自不然會學識留啲細節位，等第時輪到自己都唔使咁踢腳吖嘛。今次想講吓朋友嘅經歷。

注意⚠️ 呢件事唔係我親身經歷，我都係聽朋友講㗎咋。

開講都有話，「人情還人情，數目要分明」，而家唔單只數目要分明，連結婚啲人情都要分明嘅。人哋請飲，擺低禮金一刻，接待嘅兄弟姊妹當然唔係收起就算，基本上係要即時喺後面寫名，mark 返邊個送嘅禮金。有啲甚至分批送入新娘房即時計數添。可能怕有人塞張書籤當禮金？或者愛嚟留意下邊個去酒樓都俾四位數（注：落筆時公價係酒樓 800港幣，酒店 1000港幣），以後要對佢好啲啩。

想知要俾幾多人情？參考返 史兄《人情計算機》啦。https://www.vjmedia.com.hk/articles/2012/11/05/23144 計完個數，記得要加返三百。

不過一向嚟講大家記還記，心中都知道「即刻 Mark 名」呢件事係私底下做嘅，大家有默契唔會當住賓客面前記名 ––—你知我知，唔代表要講出口吖嘛，心照就好。如果大家咁樂意公開金額，點解唔擺本簿喺枱面，大家寫名之後下低寫埋銀碼？（啋過你大吉利是呀！）

我朋友有次去飲，佢發現原來已經進化到唔使寫字。朋友一手交低人情，枱面嘅姊妹捩手就黐咗張 sticker 喺上面。

上面寫住 20A，大概係下面呢種感覺。

聽到呢度我心諗，搭飛翔船呀？

「20A同20B，請你去角落最篤篤嗰張枱」

姊妹可能忙咗一日攰得滯，直接用個編號叫人（其實叫先生、小姐都得啫）。再望望長枱嘅另一邊，有一部手提電腦，開咗個類似 Excel 嘅嘢。貼完 label 之後，原來係要即刻 mark 落 Excel！

除咗讚嘆朋友嘅朋友物流管理世界第一之外，我都有思考其實會唔會婚禮嘅形式會有翻天覆地嘅變化呢？低科技就貼 label 用 excel 啫，high tech啲嘅，可能已經有全天候核查系統。

下次去飲，現場可能事先裝好晒 cam ，有埋認人樣功能。喺大家睇緊成長片段、朝拍晚播、新娘新郎講感受、奶奶表演唱歌各個環節嘅同時，閣下有冇感動到喊，望咗幾多次電話，𥄫咗幾多吓新娘件低胸晚裝，都一目了然。臨走嗰陣 plot 返個 graph，連埋入席前嗰張合照送返俾賓客留為紀念，都仲得呀！

「頭先我喊住講感想，你哋掛住睇電話唔望我？

我要同你哋絕交！」

咁高科技嘅婚宴，真係諗起都覺得興奮。

據講，計低人情邊個俾，係因為日後對方擺酒呀、滿月呀、百日宴嗰啲，要俾返近磅啲嘅禮金，唔好相差太遠，所以先要所有人情都記晒名。

我絕對體諒。不過可唔可以唔好做得咁揚呢。