即使世界如童話，不等於我要接受一隻青蛙（綠野仙蹤-解謎篇）
青蛙還來不及細想，已經發現在門後面的是獵人，原來奧茲大王就是獵人。
「點解係你？」青蛙問。
「嘩！真係你！終於比我見返你啦！睇黎你近黎都過得唔錯咁喎！」獵人看著青蛙所站立的地方，得出了青蛙「過得不錯」這個評語。
「你答我問題先啦！點解奧茲大王會係你？」青蛙再問。
「我同多多剛剛黎到果陣，本來嘅奧茲大王鬼咁開心，話咩『終於有人黎接班啦』，然後就坐熱氣球飛走左。」獵人如實回答。
「你講咩呀？」青蛙問。
「點講好呢？奧茲大王呢，其實係一個職位黎，可以隨時傳比第二個嘅，咁條友鬼咁開心咁傳左比我，我咪做住先！你呢？」獵人反問。
「我？我咪做左『帶住識講野嘅青蛙嘅女人』嘅青蛙囉！」青蛙答。
「我都估果隻『識講野嘅青蛙』係咪你黎嫁啦！所以先叫多多出黎搵你。」獵人說。
「只係我估唔到原來果個『金人』就係絲絲啫。」多多說。
「既然你又搵到獵人，我又搵返多多，咁我地快D離開呢度，諗方法返屋企啦！」桃樂絲說。
「唔得呀！我唔可以離開呢間房，呢度守衞深嚴，就係我驚自己想走而設嘅保險。」獵人說完，順手關上了門。
「下？你自己困住自己？」桃樂絲問。
「係，因為⋯⋯」獵人還未開始說下去前，桃樂絲用手勢示意他不用說下去。
「咁你留係度啦，青蛙、多多，我地走啦。」桃樂絲說。
「如果獵人唔走，我都唔走。」說這話的不是和獵人一起更久的青蛙，而是護衞團團長多多。
「下？點解？」桃樂絲再「下？」一次。
「好簡單，我頭先都講過，因為佢救過我一命，同埋比左而家呢份工我做；況且，佢已經係我嘅好朋友，我唔會掉低佢一個係呢度。」多多說。
「我贊成，如果要走，就四個一齊走，要留，就四個一齊留。」青蛙自和多多見面以來，第一次贊成多多的意見。
「我唔明囉，呢個鬍鬚佬有乜好？又，阿鬍鬚佬你點解又唔走得？」桃樂絲問。
「出面好多人都認為，奧茲大王識魔法，識幫人解決問題，上一個奧茲大王可能係嘅，但我呢，要做奧茲大王同埋困自己係度呢，原因只係得一個，就係我存在嘅本身就係翡翠國嘅最大問題。」獵人說。
「即係點，你諗住研究自己存在理由呢類哲學問題所以決定要留係度？」青蛙帶著嘲諷的口氣追問。
「等我講啦，你都講到唔清唔楚。」多多搶著說：「話說我同絲絲失散之後，咁自己一個四圍漫無目的咁搵絲絲，點知一個唔小心，就係山邊比一個捕獸器捉住左。我比果個鉗鉗住著腳，走又走唔到，要我咬斷自己隻腳走我又唔夠膽，一路係度等左一日一夜。」
「做乜鬼啫，明明係獵人講緊點解佢想留係度，做乜你會講你失散左之後點。」青蛙反駁。
「聽落去先啦！」多多答：「之後有一堆矮人黎捕獸器度諗住收割，咁我唯有試下說服佢地，我可以幫佢地做野，叫佢地唔好殺我啦，但佢地無理我，佢地話自己已經餓左好多日，終於都有肉食。咁我諗住今次死硬啦，無得救啦，突然之間，果幾個矮人死晒，趴晒係度，無再郁過。」
「咁嘅死法咪同獅子同猴子一樣？」桃樂絲插咀。
「咩獅子同猴子？」獵人沒有回答桃樂絲，反而追加問題。
青蛙簡單地說了鐵皮人、獅子、稻草人還有猴子的故事給獵人和青蛙聽。同一時間，稻草人也因為聽到自己的名字所以恢復了意識，繼續躺在麻布袋內。
「咁真相好簡單，就係我同你都同時係問題嘅根源。」獵人對青蛙說。
「我唔明，你嘅意思係只要我地唔存在，或者好似你咁匿埋，問題就會解決？」青蛙問。
「實際上黎講，你嘅講法係啱嘅；但咁講呢，就講到好似我地對呢堆死亡事件有責任咁，因為理論上，我地係完全無責任嘅。」獵人說。
「你講乜？」青蛙再問。
「不如聽埋我個故仔先。」多多說：「咁果時D矮人死晒，獵人就走過黎放左我出去，咁我就同佢講話不如我地一齊行動，有個照應，我想搵返絲絲，而佢都想搵返青蛙你。」
「同我地呢邊嘅情況都相似。」青蛙說。
「唔似囉！一D都唔似囉好唔好！照你個頭呀死青蛙！」桃樂絲一邊說，一邊用手抓起青蛙，用力擠壓。
「好痛！會死嫁！停呀！」青蛙慘叫，獵人看見過個情境，臉上露出了一個會心微笑。
「咁係唔似丫嘛！」桃樂絲沒有放鬆擠壓青蛙的手，繼續強調。
「係！係！完全唔同！爭好遠！」青蛙繼續求饒。
「嘿！」桃樂絲別過臉去，放開了手。
「咁我地一齊行動，收集左情報之後，估計你地都會黎翡翠國呢度搵奧茲大王，所以就出發。」多多說：「然後我地發現左一個好奇怪嘅現象，就係我地身邊遇見嘅當地人，成日會好似果堆矮人一樣，無端端就死左。」
「然後有一日，死神突然出現。」獵人插嘴說。
「死神？」桃樂絲露出了一個不可思議的表情。
「係呀，係死神。我同青蛙救過死神一命，咁佢應承過我地，會係我地死之前預先黎通知我地，等我地可以好好準備一下。」獵人說。
「但係你而家仲企係度喎。」青蛙說。
「因為黎搵我嘅原因唔係因為我就快死。」獵人說。
「咁係因為咩野？」青蛙問。
「因為我增加左佢嘅工作量。」獵人說。
「頭先你話我同你都係問題嘅根源，但又話我地對呢堆人嘅死無責任，咁死神話我地增加左佢工作量都好合理。問題係『原因』，究竟咩原因令到佢工作量增加？」青蛙問。
「死神嘅講法係，我地身上面有由我地世界帶過黎嘅『病毒』。」獵人說。
「咩野係『病毒』？」青蛙完全沒有聽過言個詞語。
「我都有問佢同一個問題，佢解釋左好多，但係我都係唔明，最後我有一個結論，所謂『病毒』呢，就好似巫婆會施放嘅詛咒咁樣，附係我地身上面，我地唔會受影響，但係我地身邊嘅人就會被『病毒』害死。」獵人說。
「咁點解我同多多一直都無事？」桃樂絲說。
「我諗我明，呢個世界上面，總有D人係唔怕詛咒嘅，巫婆會揀有效嘅對象先施法。」青蛙答。
「死神都講左差唔多嘅野，佢話我好好彩，因為係有1%左右嘅人天生係對『病毒』免疫嘅。」多多說。
「咁啱我同你都係果1%？」桃樂絲問。
「未必喎咁又，因為我同你係一樣環境長大，有機會我地係係成長過程之中，慢慢咁對呢種『病毒』免疫。」多多說。
「但係呢，翡翠國同佢嘅鄰近地區就無咁好彩，佢地真係99%人都會比『病毒』殺死。」獵人說：「死神叫我唔好比咁多野佢做，叫我快D返去自己世界，但我又想等埋你。」
「所以你為左唔好再有人比你害死，就接替左奧茲大王，再困自己係度？」青蛙問。
「係呀，而且成為奧茲大王嘅好處，係我唔使去搵你，而係你會黎搵我丫嘛。」獵人說。
「唔得，都仲係有一個問題，你話等埋我，即係話你已經知道點樣返去自己個世界？」青蛙再問。
「之前嘅奧茲大王話我聽，只要有適當嘅工具，我地就可以返去，返去公主嘅城堡果度。」獵人答。
「係咩工具？」青蛙問。
「魔女嘅銀靴。」獵人答。
「即係呢對？」桃樂絲拿出銀靴，問。
「下？點解會係你度？」獵人問。
「講開有排講，呢對野除左沾滿鮮血之外，我實在唔知佢仲有咩其他功能喎。」青蛙說。
「腳踭位果度有個制，只要著住佢，然後撳果個制，就可以飛去世界上面任何一個你曾經到過嘅地方。」獵人解釋。
「咁就好啦，我地一齊返去啦。」青蛙說。
「我呢，唔會比隻鞋你等你返去見『果個女人』囉！」桃樂絲說。
「下？點解？」青蛙問。
「你理得我！對靴係我嘅！」桃樂絲說完，穿上了靴子，用手捉緊青蛙，然後按了腳跟附近的按扭。
獵人以極快的反應跳過去抓住了桃樂絲的手，銀靴子發動能力，把桃樂絲、獵人和青蛙不知傳送到了哪裡。
「咁而家即係點？」一直躺在地上的稻草人一臉不解地問。
「Err⋯⋯我估呢，大概就係⋯⋯你係新一任嘅奧茲大王，然後我繼續係護衛隊隊長咁？」多多反問。
《完》