六月九號「反送中」遊行，去唔去好？
「送中條例」越來越近，六月九號香港正醞釀緊一個「十萬人」級以上嘅遊行，一個大形表態。
其實我諗有好多人都同我一樣，對於遊行呢件事嘅諗法就係：去呢，又好似行禮如儀，唔去呢，又好似於心有愧。
所以以下我提供一個測試，用幾分鐘，答四條問題，等大家知道，六月九號「反送中」遊行，究竟你去唔去好？
問題一：你覺得如果星期日有一百萬人塞爆香港島整個北岸，林鄭月娥會唔會收回條例？
- 唔會收返啦，阿爺柯打，做乜都無用
- 睇下呢一百萬人完左遊行之後仲有咩做先知
- 明知無用嫁啦，不過都要表下態
- 或者會嘅，話晒都咁多人
- 咁多人，佢一定會啦
問題二：你覺得除左表態遊行之外，仲可以做乜野？
- 做乜都無用啦，香港已死，做乜都唔會返生
- 或者，或者我地激進D，會有唔同效果呢
- 明知無用嫁啦，不過聯署、游行、換頭像乜都試下啦
- 下一步或者有人絕食，有人做更多野呢
- 只要我地夠堅定，政府同中央入面都有開明派嘅，有機會改變
問題三：如果事情發展成另一次「雨傘運動」，以下邊個心態最接近你嘅諗法？
- 上次搞咁耐都得過吉，咪再搞我
- 咁呢個係一個機會，今次要好好把握
- 我雖然唔可以日日出黎，但都會盡力幫手
- 上次唔夠多人同齊心啫，今次一定得
- 上次如果唔係咁激進，激嬲中央，一早成功左
問題四：如果今次失敗，送中條例通過，你會點打算？
- 其實我一早已經安排緊移民嫁啦
- 香港就咁變成中國二線城市，要贏越黎越難
- 我會盡我所能，爭取下一次抗爭會成功
- 唉，可以點丫，咪繼續返工放工
- 下次投票我地再動員，要更多議席爭取更多話語權
以上每條問題，答 1 有 1 分，答 5 有 5 分。
以上每條問題，答 1 有 1 分，答 5 有 5 分。
4至7分：心灰意冷，準備移民
當你覺得做咩都用，所以你乜都唔會做，咁自自然然，就真係會做咩都無用，呢個係一個自我實現嘅命題黎。
所以如果你一早已經心灰到咁，你真係無乜理由參加呢個遊行，有錢嘅話，你應該諗下移民（可能你已經安排緊），無錢嘅話，可以諗下第日情況超差時可以點樣偷渡去越南尋求政治庇護（我唔係講笑，風水輪流轉，歷史嘅野，要還）。
而且你拎呢個分數，基本上除非有人用槍指住你，否則你都一定唔會去遊行的了。
8至12分：機會雖微，尚可一戰
其實你知道機會已經好渺茫，但你唔想放棄，你想睇下到左呢個階段香港人仲有無機會贏返自己嘅尊嚴。
你去唔去呢個反送中遊行已經唔係重點，因為你睇嘅目光比呢個要遠，你認為呢個唔係今次遊唔遊行嘅問題，你認為呢個唔係今次會唔會有衝突嘅問題，你諗緊之後點樣先會贏。
所以，你應該去做你認為有幫助嘅野，可能係遊行，可能係支援義士，可能係上街抗爭，可能係考警察準備做卧底，可能係搵錢以應付之後嘅長期戰爭。
可能係好多野，但因為你覺得仲有機會，所以你唔會放棄，加油，三井壽！
13–16分：有險可守，希望尚存
你認為只要團結就係力量，越多人出黎遊行，對政府同中央嘅壓力就越大，只要守得住呢條條例，就守得住香港嘅法治，只要守得住法治，就守得住香港。
咁你一定要去今次遊行，因為你覺得六月九日呢個係用人數一決勝負嘅日子，只要夠多人，我地就有力量，只要有力量，我地就可以守住香港，或者未必會進步，但至少可以維持原狀。
之前你可能好少遊行表態，但你覺得而家已經係生死存亡之秋，唔去唔得了，除左你自己一定會去之外，你亦會嘗試說服其他人企出黎，表態，對政府施壓。
多一個人，就多一分力量，你深信不疑。
17–20分：天真爛漫，脫離現實
你深信，香港傳統反對派走嘅路線無錯，你覺得，中央政府都係愛香港嘅，只要你地出黎同佢痛陳利害，佢地一定深明道理，收回成命。
即使而家呢個領導人唔聽，咁係因為呢條友係一個昏君，換過第二個明君，係你地嘅若諌之下，佢一定會明白嘅。
你覺得香港係東方之珠，金融中心，國家同世界嘅接口，只要唔好太過份，中央一定會保住香港嘅獨特地位嘅。
所以今次遊行，你一定會行出黎，一定要比中央睇到，等佢醒一醒，呢個「送中條例」係百害而無一利嘅。
咁你去啦！去苦諫佢啦！做你自己相信係啱嘅野！
總結
最後放一首盧巧音嘅歌，《天佑我們》。
贏了氣勢 又怕輸去甚麼東西 路障不算甚麼東西 你我要心情美麗 橫過了赤地天涯 仍能微笑發誓
天祐我們 全為我們還算鬥士 能在最壞時刻起義 就算我不是先知 都有信心