「假使公司完全不像你預期」

前言：職場心經喺 JobsDB Hong Kong 嘅專欄，喺 2019 年第二季開始有革新。除咗原有嘅自由稿題之外，仲有「讀者問，職場心經答」嘅環節，結集於 Banking & Finance 嘅欄目入面。文章特點係，用書面語寫， (懶係) 正經啲。

嚟緊幾個星期一，我都會轉載返呢啲文章畀 Medium 嘅朋友睇，希望大家都有所得著。原文連結如下：

你有冇試過約會網友，喺網上面傾偈誇啦啦，交換近照亦睇落容貌端正，但出到嚟見真人先發現中伏？呢種「照騙」嘅案件，隨住科技發達、修圖軟件日新月異而層出不窮，即使你冇親身經歷過，怕且亦曾經聽過朋友吐苦水，差在你你係笑埋一份嗰個。

約會對象與想像中有落差，大不了冇下次。但如果換轉係返工，咁就唔講得笑，事關當事人好大機會笑唔出。再喺傷口上灑鹽，恐怕殘忍咗少少。

我唔係講笑，現實之中，好多時候求職者嘅期望，同返工面對嘅現實有啲差距。

舉個親身經驗畀大家恥笑一下。話說我曾經得到一紙聘書，喺最後一輪面試都特登問多幾條問題，例如話公司文化如何，會否向員工提工培訓之類。目的，無非都係希望喺接受邀請之前，確認自己會得到所需嘅資源同協助，以免到職先至發現自己要單打獨鬥甚至「食自己」，到時恨錯難返。

奈何當我歡天喜地咁簽咗僱傭合約，向當年嘅僱主呈辭之後，先至發現自己做漏一樣嘢。

其時有個比較八卦，或者好聽啲講，關心同事動向嘅同事 E ，好心問我一句：「喂，你新公司係邊間呀？」咁我本身唔諗住未返工就爆響口嘅，唯有簡單概括講返間公司嘅業務性質啦。殊不知同事 E 消息靈通，眨一眨眼就問：「係咪乜乜公司呀？」

我碌大對眼，估唔到佢連公司名都講得出，冇辦法隱暪或否認之下，唯有默認。正當我等佢恭喜我之際，佢笑笑口同我講：「我真係恭喜你呀！乜你搵工嘅過程之中，冇做好 due diligence 嘅咩？」

如夢初醒嘅我，呆呆咁吐出幾個字：「咁，即，係，點？」

同事 E 話，佢認識另一位舊同事 F ，亦曾經加入呢間公司，叫我可以問佢取經。

於是，我帶住涼咗半截嘅心，冒昧咁向舊同事 F 發出短訊求救。電話好快就顯示舊同事 F 嘅訊息。佢好樂意放工之後同我飲杯嘢，一五一十將乜乜公司嘅情況講畀我聽。

當晚，舊同事 F 望住我呢個陌生人，好似醫生對住一個患上絕症嘅病人咁，要坦白但又無從啟齒。

但醜婦終需見家翁，佢開門見山咁講，乜乜公司內部管治混亂，人事變動極其頻密，堪稱「貨如輪轉」 (我係咪搞錯咗啲嘢？) ；至於大老闆口口聲聲承諾嘅員工培訓，舊同事 F 乾笑一聲，然後輕輕拋低一句：「求人不如求己。」於我而言，呢句同「你食自己啦！」係冇分別嘅。

嗰晚飲嘢張單，我好似負責請客。但都唔重要啦，明知自己即將跌落另一個火坑，如何求生，比起嗰一百幾十蚊，重要性差天共地。

第二朝早瞓醒，我係搏老命搵其他空缺，希望喺短促嘅通知期內，仍然趕然趕得切搵到另一份工，拯救自己於危難之中。不過運氣嘅嘢，話唔嚟，就唔嚟。即使有一兩份工畀我極速去到 final interview 嘅階段，最終都因為唔同嘅原因而不了了之。

即係，整定我不入地獄，誰入地獄啦。

既然事實擺在眼前，而屋企又等住我開飯，無路可退嘅我只可以硬著頭皮返新工，成為乜乜公司嘅一份子。

由於舊同事 F 一早已經幫我打好個底，即係做好 expectation management ，我喺新公司並無提出任何看似合理但心知肚明冇可能成事嘅要求。原本諗住有前輩教路或者有規有矩嘅培訓課程，都一一已經打消念頭。正所謂馬死落地行，冇人教，唯有自學。

尚幸乜乜公司可能都自己知自己事，對於新人嘅要求都不至於太不切實際。我叫做有少少時間去坐暖張凳、掌握老闆嘅脾性。調低咗期望，變相發掘到任何額外嘅優點，都變成一種獎勵、一種驚喜。例如話，雖然公司真係冇人教你如何上手，但其實前人都留低咗唔少典藏、範本同參考資料畀後人乘涼。當發現到呢啲寶藏嘅時候，感覺又自然好返少少。

仕途之中，好難下下都話入大行、做 first-tier firm 嘅。總有啲時候，要冒險、承受一下「公司完全不似預期」嘅風險。畢竟招聘一方賣花賺花香，難免隱惡揚善。點樣自己盡力了解情況，覺得衰極都有個譜、搏得過，就去馬啦。管理好自己嘅期望，都係成長之中，對自己負責任嘅其中一個環節。