人總會為左莫名其妙既野燃燒生命

年輕時會話咁叫青春

老左會話，咁係不折不扣既on9。

序言

Medium 有一樣野幾好。

就係，因為依家始終中文都唔算圈子好大。穿透率係一班圍爐者入面，可以幾高。有一個話題，大家爭相傳閱完，又可以自己寫多一篇文咁樣大家交流下又分享下呢方面既意見。其實感覺上都幾 close 幾 warm，又些少以文會友既意味。呢個玩法，係 Facebook 當然做唔到，因為 Facebook 你篇文寫左，之後去左七大洲五大洋邊邊，其實都無咩人知……

Anyway，言歸正傳，最近有人寫會考（例如 華田 Watin、置地記者等等）。

會考，歷史遺物，仲有咩好講？

其實一聽到「會考」呢兩個字，而唔係「HKDSE／文憑試」，你都應該知道，呢啲一定係老餅野。老餅野除左表示自己已經老喇，成為社會上既渣滓喇，又或者已經係老海鮮可以恃老賣老甚至以上壓下之外，其實仲有咩講既價值？我就咁諗，會考雖然改左名，Syllabus 已經改晒，但係有好多野，我相信都係一樣既。

例如準備考試前果種緊張，不斷刨書搞到自己發癲既歇斯底里，對前路茫茫既迷惘，以至考完試，等所謂放榜公布成績既果種不安，我相信呢啲心情，咁多屆既學生，都唔會點樣變（天之驕子學霸果啲例外啦，但我當自己係普通人咁講既，咩會考 30 分果啲並唔係呢篇文既討論核心黎，因為我無咁既資格 LOL）。

我地果陣係人都知，除左會考，仲有高考即係 A-level，所以都未算完全係一試定生死。但本人資質平庸，一向唔係考試機器，又唔係背誦能手，就算係校內成績，都不過係中游度苦苦掙扎，去到 Form 4 附近，已經感覺到會考既壓力，好似一座大山咁樣壓係自己身上。校內先生為左趕課程，亦有理無理一樣飛書，成件事已經唔係為做學問，已經純粹係為貼題講應試攻略做主打。我唔敢怠慢，因為如果升唔返原校，果日要撲學校，非常麻煩－－

肴底，有時對自己會有推動作用

我個人極度怕麻煩。考試考得唔好事少，但升唔到原校就事大。係果陣，我真係覺得會係世界末日，唔係講笑。結果我制訂左一個預備考試既攻略：

• 第一，Cut 左屋企既56k 電話上網
• 第二，將自己既電腦分解，再放係床下底唔同位置
• 第三，我開始將勤補拙，係咁刨 Past paper
• 有關第三，如果識做，就嘗試理解。如果唔識，就死背題型
• 第四，斷六親，盡量少啲同朋友聯絡。

關於第四，可以再解釋一下。如果果班係豬朋狗友，當然就變左一切睇戲唱 K 行街，自然就會喪失考試意志。但如果果班又係岩岩講左既考試機器，已經坐定粒六，只係差在係8A 9A 定 10A，同呢班神人講野，無疑只會打擊自己自信心。寫到呢個位，我突然醒起中國語文既讀本課文其中一篇叫《我和我的唐山》，入面講有個唐山既倖存者，因為吊完一支滿滿既糖水，以後堅決唔再食甜食，我其實真係有差唔多 Feel－－

果陣見到粉紅色同粉綠色封皮既小書，我都會即刻想嘔。更加唔好講Mock Exam 以致到真Exam 考卷既果隻粉橙色。我對 Greensleeves 首歌就反而無咩野，但見到呢隻粉橙色，老實講，真係會即刻想打人。

記得 Mock Exam 完左，係初春黎，Study Leave 好快就開始，果日天氣開始熱同曬，但係蟬仍然未開始響，木棉花未開始開。考完最後一科，我稍為鬆左一口氣，因為覺得自己既用功，應該可以取得一啲成果。只要會考唔馬有失蹄，應該都可以係中六佔一席位。果陣覺得，呢種淘汰制就咁飛一半人出街，好撚殘忍，但係咁多年後先更加發現，係職場，你無任何理由都可以俾人 Cut 晒成個 Department，呢個世界講咩公平？考試已經算比較公平喇。

不過，我係 Canteen 飲緊凍檸茶果陣，我都係撞到一班仆街：

同班既高手 A、B、C等人眾。 Sorry 果陣都仲未有火影忍者，但係你當呢班係班入面既曉啦。佢地大呼小叫，隔左一陣，就已經即時將成份卷既MC 同其他答案圍左出黎喇。呢個世界講公平？我聽住佢地繼續將考試內容倒背如流，無辦法呆若木雞，呢個世界，不嬲都係，天外有天，人外有人。資質既野，就係血繼限界，無得講。最精彩我仲記得有唔知邊個係度講：

「仆街，我呢度加埋大拿拿無左一分！」

真係好多囉。屌你。（大家自行聯想我果陣擺出既表情）

當然後話講句，佢地全部都係啲會考 30 分，A-level 3條 A ，而就算講依家既成就，佢地當然都係各界別有一番地位啦。不過其實升左大學，根本已經無人講會考成績。因為真係完全唔重要（過左，就可以話唔重要囉！呢個世界不嬲都係咁架啦！）。

我連自己張藍色既會考通知書，都已經唔知飛左去邊。讀大學如果真係要認真做 Research ，同考試既 Skill 已經係南轅北轍。至於入到職場，更加係Soft skills 大於一切。有啲人就算考試零蛋，但係憑三寸不爛之舌，一樣可以撈得風生水起。我諗會考就於自己黎講，最重要既唔係成績，而係發覺自己可以為左一件事，訓左身去做，結果得出黎既結果，自己滿意。於是之後都令到我有啲情況底下，前無去路，後有追兵，有理無理死就死，做左先。

咁都可以算係得著黎既。最後既小事一則：會考最後一日，我同另外坐係後面既一位女仔交換左 ICQ uin，不過到最後，大家都無 add 到大家。呢啲算唔算另類既「淡淡交會過，各不留下印」？（驚到震就有既，溫柔共震就應該只係講緊 Young’s 既 double slit experiment啲 wave 喇。）

～全文完～感謝各位既閱讀，下次見～

>> 覺得文章不錯請多多支持／分享

>> 到 Profile Page Follow 我

>> 去我 Facebook Page 交流