「人生財技之期貨與期權」

人生財技，講緊嘅係將會計、財務、投資嘅概念，融入生活情景當中，解決一啲問題。情況類似已故作家馮兩努嘅《三國啟示錄》，差在劉備變咗撥備、孫權變咗期權，之類。

撥備嘅嘢遲啲再講。今次想介紹返，期貨 (Futures) 同期權 (Options) 。

期貨嚟講，香港人接觸得最多嘅，可能係恒指期貨，事關新聞每日都報道，期貨較現貨高水幾多點、恒指夜期升升跌跌幾多點。仍然睇緊報紙嘅朋友，亦可能知外號「因航」 (因管理不善而從全球最佳航空公司排名榜節節下跌的國泰航空) 燃油對沖周不時輸錢，其中一種常用嘅對沖工具就係期貨。

期貨嘅出處，有典故可以追朔到公元前嘅古希臘橄欖貿易，而首個正式嘅期貨交易所就可能源於 18 世紀嘅日本白米期貨交易。至於喺美國，期貨交易所喺 19 世紀中成立，最初買賣嘅期貨同樣係小麥、大豆等農產品。後來期貨項下嘅產品 (underlying assets) 延伸至金屬、原油等商品。

但概括嚟講，期貨之所以出現，實在係同商業上有需要以一個既定嘅價錢，喺未來某個時空買賣某種農產品或原材料。原因？喺生產線 / 產業鏈嘅下游，例如需要金屬生產鍋具嘅工匠、需要小麥生產麵粉嘅廠商，都有需要預早訂定呢啲 raw materials ──對於栽種需時、可能唔係一年四季都有收成嘅農作物嚟講，期貨就顯得更重要。

當然，一隻手掌拍唔響，有商品期貨嘅買家，亦要有賣家。對於農夫嚟講，預早鎖定來年叫價，亦係排除咗價格波動帶來嘅風險，事關期貨係一種合約，一旦簽訂就要如約交收、貨銀兩迄。換句話講，期貨嘅出現，原意唔係畀大家炒炒賣賣，而係要嚟對沖風險。不過講咩丫，摺凳本來應該係要嚟坐嘅，後來咪又係做咗七武器之首？

講咗咁耐期貨，咁期權又係啲咩呢？首先講返兩者嘅共通點：都係刀仔鋸大樹，透過槓桿效應，擺低一蚊按金 (Margin) 或期權金 (Option Premium) ，可以係賭緊 10 蚊甚至 100 蚊價值嘅貨物 (Underlying Assets) 。賭贏咗嘅就收錢，賭輸咗嘅就畀人沒收本金。期貨同期權同樣都有到期日，夠鐘就埋單計數，唔似得股票咁可以畀你揸到海枯石爛 (公司除牌、執笠另計) 。

咁兩者又有乜嘢分別？簡單啲講，期貨合約係一張必須履行、冇得找數爛尾嘅合約，而期權合約只係畀一個權利你，你可以行使，可以唔行使。具體嘅例子，可以係選舉投票呢個公民權利，喺香港，你唔去投票，係唔會被追究嘅。有啲公司係會向員工發行股份期權 (Share Option) ，作為月薪、花紅以外嘅獎勵，個玩法正正係設定某個行使價，鼓勵員工畀心機做好份工 — — 第時公司業績好、股價企喺呢個行使價之上，員工行使期權，換取公司股份，抵過以市價買入，鍾意嘅仲可以即時賣出套現賺差價添。公司業績唔好，股價低迷，啲股份期權大不了作廢 (冇人咁傻仔用個貴過市價嘅價錢去換股份返嚟啦) 。

期貨同期權都係人類模糊地描畫著將來嘅產物，期貨係一個承諾，期權係一個可以選擇捨棄嘅權利。呢個靈活性嘅分野，令到兩者嘅價值有所不同。由於期權合約包含咗選擇行使或唔分使嘅權利，距離到期日越來越近嘅同時，呢個權利嘅價值亦會越來越低。是以期權計價，除咗 Underlying Asset 本身價值同行使價之間差異造成嘅「內在價值」，仲有時間值呢個「外在價值」。

希望咁樣講唔會太過深奧嚇走大家。置記都唔係啲咩 CFA ，弄套三腳貓功夫純粹搞下笑。講咗咁耐，我只係問一個簡單問題：喺生活入面，你鍾意實牙實齒嘅期貨，抑或係可取可棄嘅期權？

我舉啲實質嘅例子。

返工老細氹你跑數，話如果今年公司條數靚，下年就畀你升職加人工，但如果公司條數曳，下年你要燉冬菇減人工。假設 HR 肯將呢個承諾紀錄在案，老細冇得拍拍籮柚轉工跳糟走你數，咁呢條擺喺你面前嘅紅蘿蔔就係一紙期貨合約。

咁你心大心細，又咁啱有人介紹你見工，郎情妾情一拍即合，新公司開出條件請你過檔。你一日未入職，呢個 Offer 都只係一個期權，係一個 Option 。當你拎住呢個 Option ，你又可以返去原本公司嘅老細度討價還價，事關新公司開出嘅薪酬待遇職銜都會比而家好 (否則你做乜拎出嚟獻世？) ，你可以同老闆爭取 Match Offer ，或者作出其他妥協，例如話畀你返工做私人嘢，去換取你留低。

不過，老闆食鹽多過你食米，挑通眼眉睇穿你二仔底扮四條，新公司喺行內聲名狼籍，入咗去猶如畫花自己個底。面對你嘅要求，佢採取拖字訣，等你嘅 Option 時間值遞減，去到就快要決定係咪返新工嘅時候 (如果有 Notice Period ，時間就再推前返一兩個月，所以通知期真係一個隱晦地制止員工跳糟嘅妙品) ，你只可以考慮固 Offer 嘅內在價值，冇得再跳草裙舞。

除非，你有第二個 Offer ，多一個 Option 畀你再扭扭擰擰多一段時間。

以上嘅博奕當然係純屬虛構，現實中咁樣同老闆挑機真係攞自己前途較飛。不過人生中嘅期貨期權多的是，唔同種類嘅工具構成嘅組合 (Portfolio) ，有意無意之間為你嘅前路提供更多可能性、為你嘅生活帶來更多可塑性。把握可兌現嘅承諾、活用可行使嘅權利，就有機會創造出比你本身更多嘅價值。