「人生財技之新股與半新股」

香港呢個金融市場，孕育過無數新股。 “IPO” 三隻英文字母，可以係「轉個手就賺幾十萬」嘅代名詞，過往亦真係有過上市首日爆升兩三倍，全民睇到目瞪口呆嘅「大隻佬」出現過。

又由於市旺時，新股熱潮通常一浪接一浪，今季流行嘅新股，隔兩個禮拜已經過晒氣。但係市場有時都會跟進下佢哋嘅股價，然後就起咗個新嘅花朵畀呢啲股票：「半新股」。

香港組合 Shine 有首玩味十足嘅舊歌《半成年》，頭先講嘅呢啲噱頭嶄新憧憬無限、風頭一時無兩嘅「半新股」都可以都過癮。但係潮退之後，佢口土哋往往被發現其實連泳褲都冇著。如果你話等到出埋上市後首份業績嘅話，股價嘅波幅就更加精彩。

無他，公司由私人公司變成上市公司之間，點都會經過一段發奮期，正如一個女人結婚前都會搏晒老命修身美容，喺影結婚相同大日子嘅時候以最佳狀態示人。同樣地，公司除咗真係苦心經營，亦可以透過一啲財務技巧將脂肪推去合適嘅位置，將一啲瑕疵暫時遮掩。到上市之後，引入公眾投資者做股東，舊有嘅大股東要散嘅貨都散得七七八八，到時醜婦著燈見家翁，嚇瓜家翁都冇乜所謂啦。都米已成飯焦咯。

某程度上，香港新股市場就係咁樣一直貪新厭舊即日鮮地運作，然後過咗十年八載，偶爾爆出一隻騰訊之類嘅十倍、百倍股，大家又揼晒春咁後悔當初冇抽或者冇長揸到而家。大佬，呢啲國士無雙嘅千里馬萬中無一 (究竟我一句嘢入面可以有幾多個數字？) ，真係要幾咁獨具慧眼、幾咁有信念死揸唔放先至可以賺到浪頂？畀 100 注你買落去 100 隻新股，贏一注但係其他 99 注炒晒粉，值得咩？

金融市場嘅新股炙手可熱，職場上嘅新股一樣可以好搶手。喺大學出嚟嘅畢業生，不論係一二三四班馬，其實都總有搶手嘅時候。有唔同檔次嘅求職者，亦有唔同級數嘅僱主。大行當然吸引到 First Hon 嘅畢業生投考，細行要人起上嚟，外國野雞畢業有手有腳會呼吸嘅都照殺。

「職場新股」嘅優點係無咩往績可言，冇咩五十天平均線畀你畫圖，係好係醜，端視個人本身人品性情，以及管教者施幾多肥、灑幾多水。雖然返工初期大多數都係學習手板眼見嘅功夫，但係態度決定高度， IQ 再高而生性懶散嘅，好快 Out 。

職場有別於股市，「新股」變「半新股」嘅「半衰期」 (誤) 往往有一兩年時間。當市面上出現多一兩批「職場新股」嘅時候，昔日嘅新鮮人順理成章地變成「半新股」，喺階級上可能已經係人哋嘅 senior 。由於要幫手管教「小朋友」，要運用嘅技能已經唔係單純靠自修可以習得嘅 hard knowledge ，而更多倚靠 soft skills ，泛指溝通、解難、決策、管理期望⋯⋯當然仲有辦公室政治。

問題係，「職場半新股」本身年資有限，注意力一直放喺點樣「完成」一件事，而唔係點樣「做好」一件事，更加冇機會思考「點解」件事要做。如果有個好師傅帶住嘅話，係有助浸淫呢啲技巧嘅。冇嘅話，條路或者要行得遠少少，又或者透過撞多幾次板去領略。

直到「職場半新股」已經攤到凍晒，冇人再記得佢哋幾時 IPO ，呢批「職場舊股」就隨時可以轉場、轉工、轉飯鑊。羽翼漸豐啦嘛，魚唔過糖又點會肥？不過喺執檯 pack 箱之前，如果有時間坐喺個位 (或者瞓喺張床都得) 沉澱下自己由 IPO 一路到而家嘅日子，回顧下自己當時新簇簇、乳臭未乾、滿有熱誠嘅樣子同心境，同而家略有小成、待人接物逐漸老成持重嘅面貌，或者都會感嘆一句：「怎麼走了這麼遠」？

正是：「職場起跑 Do Re Mi ，新股半新到老師；如人飲水，冷暖自知」。