「人生若是馬拉松，你仲要爆嗎？」

置記唔識游水，人生係少咁啲樂趣嘅。例如話，去沙灘或者 Boat Trip 都要好肉酸地揸住塊浮板，之類。亦因為咁，置記做咗人老豆之後，覺得其他咩嘢興趣班都假，游水唔學唔得。

咁學游水就梗係要循序漸進啦，喺小朋友可以自己捉住浮板、手腳協調咁碧波暢泳之前，游得快定慢、泳姿靚定醜，暫時都唔重要。坊間畀家長同子女一齊學泳水嘅課程，要求嘅只係小朋友肯背浮、踢腳、雙手抓住池邊橫行、跳水之後浮一段距離。

置記小朋友學咗一段時間都相當愉快，游水呢種運動對佢嘅大肌肉發展應該有多少幫助。不過，呢排游水學校唔知抽起邊條筋，話要進行客觀嘅考核，方法係要啲學生做一啲指定動作。換轉係平時，呢啲動作係小朋友每個星期都會做一次嘅，冇乜特別。但係，校方安排一個生口面嘅職員觀課，要呢啲一兩歲嘅豆𡃁喺陌生人嘅注目之下做呢啲動作，又唔係咁講法。

咁我諗我明點解校方有咁嘅安排嘅，或者係要將課程嘅結構變得更嚴謹，令所有由校方發出嘅證書變得更有公信力。又或者，係家長覺得之前嘅評估都由老師本人負責，如果好似稽核 (Audit) 咁樣由第三者進行就會比較公允，避免自己為自己評分嘅利益衡突。

啱呀，如果呢個課堂係中學或者公開考試，我完全覺得冇問題、好公道、好均真。問題係，對於啱啱學識行路，嘢都唔講多句嘅嬰幼兒嚟講，真係有必要咩？

冇，除非家長諗住靠呢張游泳證書去為子女爭一個學位，一個幼稚園學位。坊間總有「贏在起跑線」嘅講法，但係今時今日講嘅贏得早，你祖宗十八代家山庇祐，唔使識字，淨係識人都已經衣食無憂。如果冇咁嘅社會階層、社會資本 (social capital) 嘅優勢，如果要同人鬥識字，其實係漫漫長路幾十公里嘅人生馬拉松，唔係短跑一百米。提早起跑一秒半秒，對於人生成敗得失，真係無關宏旨。

唔係話咩「小時了了，大實仆街」咁簡單。職場上，縱使有專供 High-Flyers 專用嘅快線 Management Trainee (MT) Programme ，先唔好講 MT 銜頭嘅濫用與眨值，淨係睇返置記認識 MT 出身嘅人，喺十年八載之後嘅去向、近況，同其他非 MT 路線嘅朋友相比，其實唔差得幾多。畢業後快人一步唔代表理想達到，回帶咁倒求上去，大學入到「三大」亦唔代表啲乜，即使入到哈佛或者 MIT ，能夠走上鐵塔尖端嘅只係少數。如此類推，英雄真係莫問出處，讀到名牌幼稚園與否，同日後係咪名成利就，關連度認真一般般。

與其著緊一張半張沙紙，置記情願小朋友成長開開心心，能夠發掘長處而加以發揮總係好事，即使個人資質平庸，能夠培養尋找 Comparative Advantage 而人棄我取嘅智慧，喺未來未知嘅世界亦總有出路。為人父母嘅，要送佛送到西，最多咪送到去西方國家升學？要走到人生嘅彼岸，途程比起維港渡海泳甚或橫太平洋更遠，容許孩子適合嘅步伐走佢嘅一步一生，先算功德無量。