交換生月記5.5
純粹報告近況
正式離開香港五個月，想返香港但又唔捨得呢邊生活，矛盾。感性嘢唔講太多，等遲啲有時間再慢慢組織，而家喺農場生活中，自由時間唔多，我希望先放低稿債專心感受呢度嘅生活。
上次講完反送中，之後有三日都喺屋企睇直播睇全日，唔係本身約左人都唔會出門口。過程中嘅憤怒、擔憂、緊張，睇得我寫嘢嘅人應該都有同感，在此不詳述。但有兩點想分享一下：
- 我去左車站擺攤宣傳反送中。（感想後補）
- 請大家課金支持各自喜歡嘅媒體。
呢幾日都有唔同媒體做網上直播，甚至有港台司機無辜中槍。佢地真係返工都搵命搏架。
大家成日話香港01係共媒、TVB報道偏頗，咁你地有無真係罷睇？人地有內地資金科水，咁其他媒體呢？我地坐以待斃、由得其他媒體自然消亡，其實間接助長紅底媒體佔據我地生活。
唔好再講啲咩「佢地有我嘅瀏覽，可以收廣告費搵錢啦」。先唔講你嘅幾個F5究竟帶到幾多收入，當俾得起錢嘅廣告商都變成紅底，咁份報紙仲可以依賴咩為生？唔通真係好似明報咁為錢放棄自己？得罪講句，俠義風骨唔可以當飯食，亦唔應該拎黎當飯食。
我只係想講，609 612有直播唔係奉旨，媒體作為第四權監察政府已經唔再係必然嘅事。如果你有份使用，希望你可以身體力行地支持佢哋，而唔係轉個頭就買三四十蚊嘅喜茶海底撈再放上instagram打卡。 你用幾十蚊睇新聞，人地用條命去報導新聞，如果咁樣都可以take it for granted，咁你都take共媒當道for granted啦。
趁而家大家仍然意識到媒體、知識付費嘅重要性，就講定呢啲先。唔係嘅話，過多一排大家又會繼續屌蘋果免費變收費，轉台睇其他免費嘢。
良心消費唔淨止係去小店買嘢咁簡單，成件事係由生活細節做起，用自己嘅消費無型中投票，鼓勵自己相信嘅理念延續落去。
不厭其煩再講一次，免費，係最貴架。
真。報告近況
瑞典最出名係佢嘅大自然，而且佢哋好強調local production同埋有機種植，總之就「環保L」feel啦。要去了解本地製作究竟有乜好，最直接就係參與製作過程、觀察本地人嘅生活。
結果我而家喺有機農場住緊，每日喂兔仔、執雞蛋、種番茄，佢地食咩我就食咩，其實同之前好熱門嘅打工換宿分別不大。不過有得一路摘士多啤梨一路食、飲新鮮牛奶、用cured ham同走地雞蛋炒冷飯、獲得瑞典山區肺，都咪話唔爽。
