中篇小說︰《逃出切爾諾貝爾》(9)

9. 記住成功只有一次機會，頂籠兩次

東尼響盤問咗頭先果個黑衫人之後，好快咁就定好咗一系列嘅計劃。當聽到可以反擊恐怖分子嘅計劃，話唔緊張就假嘅，但係比呢一切都重要嘅係，逃離呢個鬼地方嘅計劃。

首先係由東尼自己一個人繼續探索四號機組餘下嘅部分，搵出餘黨同其他人質所在。東尼拿咗黑衫人嘅槍就嗱嗱聲離開喇。橫掂我又唔熟呢度嘅環境，響度只會阻手阻腳。

我要做嘅，係同頭先俾我哋救起嘅三個人一齊由頭先嚟嘅水池裂口逃走，搵第二條路出去。好彩佢哋三個都識游水，潛水應該都唔係太大問題啩。

我們四個鑽入個池度，冇幾耐我搵到頭先嚟果時嘅果條罅，就叫佢地埋嚟。冇咗東尼去依靠，我更加要小心，因為跟住落嚟嘅每一步都會非常危險。

由洞穴嘅水氹走出嚟，我哋都鬆一口氣。我拎起頭先東尼放低咗嘅長槍、頭盔同對講機。東尼相信隊長嘅對講機仲可以用，恐怖分子亦都沒理由去破壞佢。只要搵到佢，東尼就可以同我哋呢邊取得聯繫，前提當然係佢拎到隊長部對講機。我開咗部機，掛響腰度，兩隻手拎起長槍。至於頭盔，我就決定唔戴喇，橫掂兩個頭盔都唔夠四個人分，咁不如都唔好戴算喇。

開咗個電筒，由頭先嘅路走返去，我哋全部人都粒聲唔出。始終我哋都只係啱啱見過冇耐，三個人啱啱先做完人質又驚魂未定，除咗多謝我哋之外都講唔到啲咩；而我心諗，都係咪咁快多謝我住，有命出到去先講啦。

一路行嘅時間，最後都係由我嚟打破沈默：「響你哋人質當中，有冇一個同我差唔多年紀大嘅的女人？」其實我都記不起佢幾多歲，只係一味靠估，如果我哋係朋友，又或者真係男女朋友關係嘅話，年紀應該差唔到幾多啩？

一開始冇人出聲，但冇幾耐其中一個比我高一啲，中等身形嘅金髮男子就開口喇：「咁講起上嚟好似係有一個，但係佢俾恐怖分子捉到之後就即刻俾人帶走喇。」

如果係咁嘅話，咁佢應該真係曾經響度，而且係同我一齊過啩？佢俾恐怖分子帶走之後，會唔會⋯⋯？我已經唔敢多諗。

「同你一齊嘅果個烏克蘭人，」有個身形略帶少肥嘅男人講，佢係指東尼，「睇嚟佢唔係普通貨色。如果係佢嘅話應該搞得掂。」

「望係咁望啦。」我答佢。都冇其他更好嘅辦法喇。

X X X X X X X X X X X X X X X

我們沿路走，就嚟行到頭先放欄杆梯，即係個窿嘅入口果度喇。

「喂？你響度嗎？」突然傳嚟一把沙嘅聲音，我哋都呆咗一呆。原來係由對講機傳嚟嘅。睇來東尼已經搵到隊長嘅對講機喇，而且好彩嘅係運作正常，睇嚟比想像中順利。

「係我呀。你搵到對講機喇？」雖然而家講呢怡都係廢話多。

「係。講起嚟都算好彩，俾我找到佢。我係響主控制室搵到嘅。但奇怪冇人響度喎……」

「你搵勻哂成個四號機組未呀？」

「佢地就響第二控制室，不過我只係遠距離監察住，正面攻入去嘅話一定打唔過佢哋。」傳嚟嘅聲音帶有一絲緊張。「而家我想講下我哋計劃剩返落嚟嘅部分。」

我們四個就企咗響個窿嘅入口，聽住東尼講述他佢進一步嘅計劃。

「由現時嘅表面跡象睇來，人質同恐怖分子應該係分兩批人聚集。而家係休息時間，所以正如我所講佢地唔會走得太散。總之，如果可以壓制到第二控制室，就應該可以破壞佢哋嘅計劃，救到人質出嚟。」

「我剛才問咗佢哋，睇嚟有似我朋友嘅人響裡面！」我忍唔住向佢嗌。

「冷靜啲先。既然正面衝突唔係辦法，我哋就嚟個聲東擊西。」

「聲東擊西？唔通你要我們⋯⋯」

「冇錯，燃料棒應該就響果啲貨車裡面。如果破壞到佢哋嘅話⋯⋯」

咁聽起嚟好顛，但東尼話我聽嘅，我都通通記住咗。

「記住，成功只有一次機會，」我諗起咗東尼再三提醒我嘅說話，「頂籠兩次。」

（待續）