中篇小說︰《逃出切爾諾貝爾》(4)

4. 問題係入咗去之後

「你話有人要救⋯⋯唔通係話呢度除咗我哋仲有其他人？」我個腦似乎又加多咗一個疑問喇。

「睇你個樣你失咗憶，我唔怪你，」東尼望咗一眼小屋外面，擰轉頭同我講，「但先唔好講我個隊長，咁同你一齊果個女仔呢？你都唔可以揼低佢走咗去㗎？」

咩話？女仔？仲要係同我一齊嘅？

東尼似乎睇到我成個人呆咗響度，於是就講：「你失憶得似乎好嚴重喎。佢唔係同你一齊嚟㗎咩？」

「講起上嚟，我哋係點嚟到呢度嘅呢？」

「你問我，我都答唔到你喎⋯⋯其實我係負責巡邏核電廠周圍嘅，以防止有可疑嘅人入嚟。你知啦，呢度荒廢咗咁耐，我地都唔想有人用來做不法用途。」東尼俾我睇咗佢張職員證，雖然睇唔明啲文，但睇個勢應該似係逮屬烏克蘭政府。係咪真係有咁嘅組織㗎？但我又睇唔到佢有任何要特登講大話嘅理由喎。我一個崩都冇，佢想求財又求唔到，又唔係想要殺我。

「總之我同隊長遇到你地嘅時候，你地就俾幾個人圍住咗喇。」

「竟然有咁嘅事⋯⋯咁之後呢？」

「然後我哋試圖救你哋出嚟，但一個唔好彩，隊長而家俾人捉咗，而我和你哋響果時都失散咗。」東尼擰頭，「我估九成又俾佢哋捉走咗喇。」

竟然會有咁嘅事⋯⋯身處一個奇怪嘅地方，呢度有一個人話我聽，一個曾經響身邊嘅人俾人捉咗，仲要我係冇印象⋯⋯我可以點救佢？講起上嚟，我係咪應該相信呢個東尼講嘅嘢呢？

「好嘞，我雖然冇試過失憶，但可以體會你嘅感受，心裡一定很亂定喇。」東尼繼續同我講。「你可以選擇唔信我，這裡嘅出口響一廠正門，即是話響頭先我地撞到嘅另一邊。不過，我諗佢哋應該響度守住所有出入口，要出去都唔係話咁易。」

「你唔係有槍咩？掃低幾件就得啦。」我指住東尼枝獵槍講。

「這枝係獵槍，係為咗保護我自己唔受野生動物襲擊傍身用嘅。因為係要驅散動物，所以發射時係特別響。一旦開火嘅話，實引哂佢哋過嚟都似，雖然我唔清楚佢哋到底有幾多人。唔係迫到埋身我係唔會用嘅。」

「咁你打算點救人？」

「我諗到個計劃，」東尼眺望小屋外面，棟響度嘅一排排發電機組，「但希望你可以幫吓我。」

X X X

烏克蘭嘅夜空，好似比香港嘅嚟得清澈。仲可以睇到點點繁星，呢點都係響香港冇可能嘅事。

「你呢個提議，聽起嚟真係好瘋狂，」但我哋冇心情觀星。我跟住東尼向住一號機組走去。

我哋決定等到太陽落山後先出去，費事俾人發現行蹤。沿路我哋都唔見「佢哋」嘅蹤影。頭先離遠見到有幾架大型卡車，係有啲奇怪。東尼話佢都唔知道佢哋係咩嘢人，只係由佢哋之前圍我哋同所揸嘅疑似槍嘅武器嚟睇，佢哋絕對唔係咩善男信女。除此之外，因為怕出聲會暴露咗我哋嘅行蹤，所以我哋一路上都冇乜點出聲。

原來我哋正話撞到嘅地方係叫主樓，旁邊嘅小屋係位於成個核電廠區域嘅邊界。而響主樓嘅另一邊，即係面向後門向左望，係一至四號反應爐機組，依次序排列住。

我們要去嘅目的地，就係響主樓旁邊嘅一號機組。我哋由主樓嘅後門潛入，因為東尼有鎖匙，所以要入去基本上係唔成問題。

問題係入咗去之後。

（待續）