中篇小說︰《逃出切爾諾貝爾》(2)

2. 香港人睇到呢度，應該都會Google一下

窗外嘅景色令我呆咗。

窗外係藍天，係難得嘅好天氣。有幾嚿白雲浮響空中，睇佢夕陽高照，而家應該係晏晝到。

活動室嘅兩個窗口冇錯係帶嚟咗充足嘅陽光，雖然啲玻璃窗早就碎咗。望出去係一棟又一棟睇起上嚟已經荒廢咗嘅工廠群，排到整整齊齊。工廠係淡灰色嘅建築物，睇嚟已經有超過五十年歷史。建築物嘅窗戶都爛哂，有啲頂部更加係剝落一大塊，根本係危樓。望遠啲，有一棟有煙囪嘅建築物睇落殘缺不堪，奇怪嘅係，佢外牆鋪咗一層水泥，似係一個臨時起上去嘅屋頂，冚住咗呢個老舊嘅建築。如果佢真係工廠，應該亦都係廢棄咗嘅工廠，相信已停止運作。

講講下話唔定我而家身處嘅呢棟建築物都是一座危樓嚟個喎？所以我而家打算走出室外先再諗。返返去走廊，一直走返去402號房間外。走廊嘅另一邊，分別有一條上去同落去嘅樓梯。向上行嘅果條有鐵閘封住，應該係去天台嘅。即係話四樓就係最頂層喇。我睇到鐵閘嘅鎖俾人整爛咗。走埋啲睇，呢條鐵製嘅樓梯好明顯已日久失修，大部份油漆已經剝落，隱約可睇到有一啲啲綠色痕跡，可以想像到新起好果時係草綠色嘅。

不過冇興趣上天台嘅我，一心只係想逃離呢度。於是我沿住向下果條樓梯走。踩響樓梯級上面，鐵梯發出咗吱吱聲，但都算穩陣。我心諗，如果我最初係由這裡爬上嚟嘅，咁應該都可以由這裡行返落下去啩？

我慢慢咁走落樓梯。睇嚟下面三層都係一模一樣嘅間格，換句話講，呢棟建築物一係係酒店，一係就係宿舍。

走到地下果層，走廊上有好多佈告版，令我覺得呢裡不是酒店。佈告版上貼滿唔同嘅紙張，全部都係東歐文字（似俄文），一個字都睇唔明。但果啲紙張嘅右下角都有一個標誌。我哄個頭埋去睇真啲，基本上係一個化學放射性標誌，加上一堆似俄文嘅嘢。但響下面有英文，佢寫著⋯⋯「Chernobyl Nuclear Power Plant」。

……唔通係邊度嘅核電站？

講真，我都係企咗響呢塊佈告版前諗咗陣，先知道呢度係咩地方。如果有人話到俾我聽佢寫乜，我會非常感謝，縱使我冇咩報酬俾到你。不過講真香港人睇到這裡，應該都會Google一下上面嘅「Chernobyl」係邊度啩？之但係諗深一層，其實估到應該估到⋯⋯

Chernobyl⋯⋯俄文嘅地方⋯⋯

⋯⋯切爾諾貝爾核電廠。

我當初得出呢個結論時，心入面都打咗個突。呢度文字並唔係俄文，而係烏克蘭文。我響烏克蘭北部嘅一個叫切爾諾貝爾嘅地方。

我而家冇維基百科響手，但唔使查都知道，呢間核電廠曾發生過嚴重洩漏事故。頭先睇到嘅果個煙囪，應該就係出事故爆咗嘅核電廠啩？諗到呢度，全身嘅毛孔直豎，好似有條蟲躝過個身咁。呢度唔係俾洩漏嘅幅射污染咗㗎咩？我係唔係會很快冇命？

但諗深一層，單嘢好似係響八十年代發生嗰喎，都過咗廿幾年啦，幅射量應該跌咗好多喇啩？我唔知道，只係想走出呢個鬼地方先。

睇起上嚟，呢度應該係員工宿舍啦。當我走去大門口果時，睇到一件相當奇怪嘅事。門口塞滿哂辦公櫃同埋枱凳，亂糟糟咁堆響門口。成件事似係為咗唔俾人入嚟而封死個入口咁。唔通我之前係避緊邊個？

雖然話係塞住個入口，但而家睇嚟來已經俾人夾硬入咗嚟，門口對開果個位已經俾人清空咗，櫃和枱凳都散落兩邊。唔通有其他人曾經入過嚟？

我保持警惕，決定盡快由後門離開呢度。我向住相反方向跑，到咗走廊的另一邊，轉個角後我睇到有逃生門。我靜靜雞咁打開佢，帶住一堆疑問，向出面嘅未知世界走出去。

（待續）