中篇小說︰《逃出切爾諾貝爾》(12)

12. 不分晝夜，都係漆黑一片

下定決心之後，我掹低長槍嘅扳機。

「砰！」我期待會有爆炸，即使係一兩架車都好吖唔該。但子彈打中卡車後，就好似理所當然咁郁都唔郁，彈痕都因為視野低而睇不清楚。係咪為咗偷燃料棒而將卡車補強咗，所以更加堅固呢？定是根本咁樣只係我哋自尋死路？

卡車左邊嘅果兩個人明顯咁俾槍聲嚇咗一跳，急忙將目光掃過嚟聲源呢邊。但由於入黑嘅關係，兩個都睇唔到我哋蹤影，但肯定嘅係，佢哋會走埋嚟確認，到時我哋就玩完喇。

同我一齊嘅三個人都亂咗籠喇，「快啲走啦！」我聽到身後嘅肥仔講。

但響呢一瞬間，我諗起東尼提醒過我嘅說話嘅後續：「⋯⋯頂籠兩次。」

如果我仲有一次機會呢？

我即刻重新裝填上彈，長槍發出清脆嘅「卡唰」一聲，似係收到我嘅指示。

果兩個人開始走過嚟喇。眼角餘光見到佢哋舉起槍支警戒住。我哋既然已經錯過咗走人嘅黃金機會，再一次失手就等於死亡。

應該係油蓋位置冇錯。再一次瞄準。

「砰！」「轟！」

突然之間眼前好似超新星爆發咁，巨響加上火球嘅光亮，令我哋都烏低身去避。「轟！轟隆！」又有兩聲爆炸聲，應該係擊中咗其中一架卡車後，波及其他車所造成嘅連鎖反應。

「成功咗喇？」「快啲閃人！」我哋亂成一團，我大嗌：「走呀！」即刻離開呢度﹗

心情雖然激動，但根據原本嘅計劃，我哋仲有最後一個步驟：退到防核地下室，將自己反鎖響裡面。

「東尼！聽到冇？我哋成功咗喇！」我向住對講機大嗌，但果邊好似冇反應。

因為卡車已被俾我哋破壞，照道理我哋係贏了一仗嘅同時，對敵方亦有相當嘅動搖。如果順利嘅話，更加能夠引開東尼果邊嘅敵人，令班人質 — — 以及我嘅女朋友 — — 順利脫困。

最後，班人質再由東尼嘅帶領下，同我哋響地下室會合，等待救援。

聽起來係好癲下，但講真最難果部份 — — 打爆架卡車 — — 已成功咗，剩返落嚟嘅亦應能順利克服先至係。但係點講呢，世事都應該冇咁理想㗎嘛。

每一座機組嘅地下，都有一個能容納多達五十人嘅防核輻射地下室，裡面有足夠嘅飲用水、罐頭食物同埋通訊儀器，足以令呢五十人維持三年咁耐。

當然經過咁多年，水同食物係用唔到㗎喇，我哋只求利用果個空間，擋住被破壞咗嘅卡車裡面嘅核燃料棒輻射，同埋恐怖分子嘅攻擊。

我嘗試重覆呼叫東尼，但佢好像閂咗機咁，連沙沙聲都冇。唔通冇電？

一路上，每當我哋探頭見到有人向我哋衝埋來時，都會打個突嚇一嚇。但佢哋都好似睇唔到我哋咁，向住焚毀嘅卡車方向衝去。一來係我哋都熄哂電筒摸黑前行，二來應該係敵人今鋪真係因為我果一槍而亂咗陣腳。

終於俾我哋搵到通去地下室嘅門。呢道「門」係一個揭蓋式嘅頂蓋，金髮男將佢拉起後，我率先落樓梯入去，冇時間喇﹗睇到樓梯底部盡頭係一道厚重嘅、好似夾萬一樣但比人高少少嘅大門，門上有一道玻璃窗。玻璃窗封咗塵，即使打開電筒都唔太睇到入面嘅情況。

「要打開門喇。」呢個時候都顧唔到咁多，總之入咗去先講。

（待續）