下次下次

以歌手計，鄭融係永恆地處於二線嘅。上唔到一線，但係又有幾首 hit 歌係家傳戶曉嘅。未如願相戀，便學習單戀。明明綠燈，轉眼變成紅燈。下次下次，下次大概可以。如果佢生高少少，或者膚色白返少少，可能星途已經有啲啲唔同？

曾經，或者好像曾經，有位社會學家，應該是蠻左派的，也很可能是歐洲人，九成是男人，說過這麼一番話。說，在資本主義制度下，無產階級人士會逐步失去自我價值與尊嚴，接受自己是社會運轉巨輪的一顆螺絲釘，願意為社會永無止盡的奉獻勞力，給資本家奉獻青春，白了少年頭，收不到平生應得的回報，只淪為勞動機器。

這一番話，幾多成真，幾多成有學術根據，我都不知道。反正在大學的三年，其中一樣最重要的發現，就是我這份人不求甚解，更厭惡於引經據典時要寫footnote再quote reference，還要依美國某種academic writing的格式。所以，即管當上述的一番話，是可能成立的理論就好。緊要的是，我自覺人生開始轉營，即使報新聞食少了螺絲，但整個人就是一粒幼幼長長的螺絲。

Screw. 起來的時候，應該就是Screwed-up。我，也自然是Screw, me。Screw me? Screw me. 對於工作，我其實甘之如飴。尤其是，當我在船底賓至如歸，返工有如返屋企的時候。毋須因為勞役致死，只消勞役至死 (分得清嗎) ，人生也應該有一個「亮點」、有一份光榮。這是在沒有其他亮光之下，螢火蟲都可以很耀眼的道理。

返工前，作了一個決定。放工後，接到一個電話。我覺得，太遲了。不是我選擇，只是我被選擇。收線後，是薛凱琪的《下次下次》，我還想得起電話內，我連禮貌上講句「下次有機會再約」都懶。因為根本不相信「有下次」，又怎麼可以將「下次」二字吐得出口。返工前，是解脫。放工後，是淘汰。自我淘汰，就是放過自己。好應該是一個雙贏局面，但雙輸的感覺只有自己知道。

選擇了逃離現場，也因此很欣賞日月報的勇氣。這份 (被某員工) 號稱公信第七的報章，在日前狠狠鞭韃《中大學生報》編委「超越社會道德、有歪倫常、應該一死以謝天下」 (之類) 過後，今日的社評掉轉槍頭，指責中大校方反應過激、應該與學生坐下來商討善後。從喊打喊殺，到主張擺和頭酒、一笑泯恩仇，分飾神鬼，食晒兩家茶禮，贏晒。

如果日月報此戰大獲全勝，然則鐵板一塊，貫切始終地批評台灣當局「別有用心，以維護人民福祉與全球健康為藉口，企圖破壞一個中國的事實」的中共當局，是否不夠醒目？又或者，殊途同歸，高招與低手，都有獲得勝利的權利與資格？

不緊要，即使現實註定是零和遊戲，也起碼有我一個做輸家。寫稿啦，講。

(2007 年 5 月 15 日)

上一個豬年，我為自己係商業社會一粒螺絲釘而感到不忿。喂大佬，讀咁多書，出嚟做螺絲？嘥唔嘥啲呀？又話我要努力向上，不負諸君厚望嘅？

嚟到今個豬年，我對於螺唔螺絲已經睇得比較開。因為世界從不因為一個人而改變，如果有改變，最低限度一個人要感召到一群人，而後有群眾運動去促成呢個改變。螺絲係必然，就如返工都係必然。咁做老闆唔叫打工仔啫，咪又係自僱人士？有幾多個老闆係可以唔使返工巡視業務而唔會餓死架？我樓下間泰國菜個老闆日日喺度打躉同客打邊爐架！ (大誤)

勞工處啲廣告成日都話，積極溝通，達致勞資雙贏。而我心諗， “win-win situation” 喺現實中有可能嗎？除非真係好科學咁，有化學作用而個餅大咗架咋喎，否則，兩家談判，通常都係一家賺、一家蝕。或者咁講，一家賺多啲，一家賺少啲囉。有幾多、有幾可，係兩邊傾完之後都覺得自己賺左、係贏家嘅呢？有嘅，信息不對稱嘅情況之下，自我感覺良好囉。俗稱自 high 呀老友。

其實我都唔記得 2007 年 5 月我做咗個乜撚嘢選擇。可能係 send 咗個 text message 畀某個異性，話我都係唔追落去喇，無謂勉強大家，之類。咁當然，男共女、情共愛，一切亦屬正常。男追女，隔重山，見到座山太高太遠，唔撚行落去，扯白旗投降，真係唔係啲咩瘀事。

純粹係事後人哋聊以安慰嘅問好，比較令人覺得彩你又攞咗，而家仲要派好人卡，「我希望大家第時仍然可以係好朋友」咁，太多餘。事實證明，冇 pursue 落去嘅關係，好快就 close file ，因為大家都 move on 啦。女嘅收唔到兵，男嘅冇兵糧食，自然各自各轉場尋找新嘅對象，因為時間好寶貴，青春勿浪費。