一個男生和高粱，我一定毫不猶疑選擇58度的金門高粱

話說一晚有人生日，台北的朋友從台北買來正宗的金門高粱，是壺裝的。

1949之後國軍撒到去金門。當時有個將領叫胡璉，陝西人，係佢將北方高粱帶去金門種植及釀酒。那時釀高粱純粹為咗賺錢買軍糧，及用高粱杆做燃料。曾經因為產量過多，堆積了一大批在防空洞，但結果這批酒越放越好。台灣男人當兵的幾乎都飲過，現在到政府招呼人都係飲佢。種高粱，打井取水，釀酒，都在金門。

之前喝過聲稱是國民黨員介紹的金門高粱。

金門高粱好易有假，例如個樽同label 9成似，但擰去後面寫住「廈門」。有啲係用個舊金門高粱樽裝啲不知名酒入去……

呢隻金門高粱飲落去好薄身，唔太香，唔係好 impressed. 唔需要 encore，帶支酒來的那條仔也無得encore.

跟住那天晚上，台北來的那瓶金門高粱是壺裝的，像香港買到的五家皮，玫瑰露。想起武俠片，啲俠士擸起成壺就由頭臨落身，都幾係嘢。

58度，其實不算甚麼。剛剛去露營，我帶去請人飲的威水，係講緊61度。家裡隨便抓支烈酒，正常也45–50度，cask strength 55–60度係好正常。重點是，你度數高得來，是否可口怡人。有些酒，幾十度，酒下去辣到不得了，像喝火水。就好似有啲人，以為自己好激進好型，但一啲都唔吸引，一味「高度數」而已。

以下呢支酒，望落去應該掂呀？Glen ord 都係幾好嘅廠，但就係辣得緊要。

Highland park 嘅 light 同 dark，同樣是 cask strength， 香氣襲人，調和balanced 而有風格。

高粱殺人，可口的高粱，殺人於無形。像糖水一樣順喉。靚的中國烈酒，茅台、高粱，是黏的，厚 body. 用較 scientific 的講法，就是viscosity高。流進口中，是以「瓊漿玉液」來形容，甘甜而豐腴。用美玉製成的漿液，古代傳說飲了它真可以成仙。

就以它殺人於無形，雖然好喝，卻不敢多喝，如芍藥女子，花開豔麗，卻不敢輕碰，只能淺嚐。

席中男子不以為然，已經飲至微薰，一傾而瀉，倒了大半杯。眾人起哄，一飲而盡。

片刻，佢已經胡言亂語，當我才在眾多威士忌群溜出，試探這度數莊嚴但外表滑稽的高粱，男子已倒地不省人事。

這晚我的心已經深深被俘虜。一個男生和高粱，我一定毫不猶疑選擇58度的金門高粱。但無論幾鍾意都好，知道自己唔會受得住，只能勒住自己要淺嘗，還不能大口。「傲嬌」地飲高粱的體驗還真折磨人。走得太近會銷毀，太遠則無法體驗，就是那微妙的距離，才令人如癡如醉囉。

香港好多 so called 「假」高粱，釀高粱其實唔貴，所謂假意思非原廠出，及質素問題，例如是新酒，例如來源不明。這支是陳年高粱，大約1200台幣，原來台北還有比這更貴的。有機會去台北，不買威，買高粱。

另一隻我喝過好飲至極的高粱，是自家釀製，問製酒人，佢話：「去裕華買啲麴」。（佢係咁講，但真係唔知點整)

圖中呢支就係自家釀，再座熱小小飲，像溫熱的糖水注入心坎，唔覺唔覺飲多兩杯，唔駛58度，40度都死啦。呃女仔，真係一流。不過這個釀，度數未必好高，究竟可唔可以叫高粱，真心唔知。比起辣喉火酒，呢啲絕對係危險品。能製好酒的男人，真係唔知好人定壞人。

最後事件中的男生，動用了十多人之力才抬得走。我還是捨不得這壺被他白白花費的高粱。